YESUS LAHIR

KISAH KELAHIRAN YESUS

Bahasa Ambon

Propinsi Maluku

SERI BUKU KISAH DARI ALKITAB 6

YESUS LAHIR

KISAH KELAHIRAN YESUS

Bahasa Ambon

Gereja Protestan Maluku 2008

Yesus Lahir

Edisi Kedua © 2008 oleh Gereja Protestan Maluku.

Kisah Kelahiran Yesus: Teks dalam bahasa Ambon di Maluku,

Indonesia

The Story of the Birth of Jesus: Main text is in the Ambonese language

of Maluku, Indonesia

Digambarkan oleh Noel Dapit.

© 2004, Yayasan Kartidaya.

Dipakai dengan izin.

Dilarang memperbanyak buku ini untuk tujuan komersial.

Untuk tujuan non-komersial, buku ini dapat diperbanyak tanpa izin dari

GPM.

Buku ini dapat dibeli dari:

Lembaga Pembinaan Jemaat

GPM, Ambon

Edisi Kedua

September 2008

Ambon, Indonesia

iii

GEREJA PROTESTAN MALUKU ( THE PROTESTANT CHURCH IN THE MOLUCCAS )

ANGGOTA PGI

BADAN PEKERJA HARIAN SINODE

BOARD OF SYNOD

ADDRESS: JALAN MAY. JEND. D. J. PANJAITAN - AMBON 97124 TELP. (0911) 352248-342442 FAX: (0911) 312440 E-mail: sinode@ambon-wasantara.net.id CABLE ADDRESS: BPGPM AMBON

KATA SAMBUTAN

Basudara samua yang Tuhan Yesus sayang!

Gereja Protestan Maluku seng parna barenti dalang usaha par biking

jamaat labe mangarti deng tau soal Allah pung Kabar Bae. Sala satu

cara tu, katong biking carita-carita soal Allah pung Kabar Bae pake

katong pung bahasa hari-hari biar jamaat samua bisa labe dekat deng

Tuhan Allah.

Bahasa Malayu Ambong ni, akang pung nilai sama deng bahasa-bahasa

daera laeng. Bahasa ni, akang hidop. Orang pake akang sabang hari,

bae di ruma deng di luar ruma. Kalo samua orang dari kacil sampe

basar baca buku dalang bahasa Malayu Ambong, dong bisa tau deng

mangarti akang labe capat.

Beta, pamimping GPM, mau bilang par katong samua biar katong tarus

pake buku-buku ini dalang samua ibada. Katong jua pake akang par

kasi balajar orang-orang yang ada di sakitar katong biar dong tau lai

soal Tuhan Allah pung ajarang. Beta harap buku ni, akang bisa uba

basudara dong samua pung hidop deng bisa sampe ka samua orang di

Maluku.

Waktu basudara dong mulai baca buku ni la dapa apapa yang seng pas,

tolong bilang akang par katong biar buku ini bisa jadi labe bae.

Beta minta dangke banya par Tuhan Yesus. Beta minta biar Antua kasi

berkat par katong samua.

Dangke banya lai.

Ambon, 24 September, 2008

Badan Pekerja Harian Sinode GPM

Pdt. DR. J. CHR. RUHULESSIN, M.Si.

Ketua

1

Waktu Elisabet su deng badang anam

bulang, Allah suru malekat Gabriel pi

par Maria di kota Nasaret di propinsi

Galilea. Maria ni parampuang parawang.

Dia su batunangang deng Yusup. Yusup

ni raja Daud pung ana cucu.

Lukas 1:26-27

2 Lukas 1:28-29

Malekat tu bilang par Maria kata, "Salam

Maria! Ale dapa berkat basar dari

Tuhan. Antua ada deng ale!"

Maria tacigi pas dengar malekat

bilang bagitu. La dia bilang dalang hati

bagini, "Salam ni, akang pung arti apa

e?"

3 Lukas 1:30-33

Tarus malekat tu bilang kata, "Jang

taku Maria. Barang, ale dapa berkat

basar dari Allah! Ale ni nanti deng

badang. Abis itu, ale pung ana laki-laki

satu lahir. Ale musti kasi nama Dia

Yesus. Dia nanti jadi orang basar. Deng

ada yang bilang kalo Dia tu Allah yang

Paleng Tinggi pung Ana. Tuhan Allah

nanti angka Dia par jadi raja sama deng

Dia pung moyang, raja Daud. Dia nanti

pegang kuasa tarus-tarus par samua

anana cucu bangsa Israel."

4 Lukas 1:34

Mar Maria bilang kata, "Bagemana

akang bisa jadi bagitu? Barang, beta

balong parna tidor deng laki-laki!"

5 Lukas 1:35-37

Malekat bilang kata, "Tuhan pung Roh

nanti datang par ale. Tarus, Allah yang

Paleng Tinggi dari Samua pung kuasa

tu, akang tutu ale. Tagal itu, ale pung

Ana tu seng ada dosa sama sakali. La

orang bilang Dia tu Allah pung Ana. Ale

pung sudara Elisabet yang su tua, yang

dolo orang bilang dia tu seng bisa pung

ana, mar sakarang ni, dia su ada deng

badang anam bulang. Barang, Allah bisa

biking apa sa."

6 Lukas 1:38

Maria bilang kata, "Kalo memang musti

jadi macang yang ale bilang tu, beta

tarima sa. Barang beta ni, Tuhan pung

orang suru-suru lai." La malekat tu pi

kasi tinggal Maria.

7

Waktu raja basar Agustus parenta

karajaang Roma, antua kasi kaluar

parenta par kasi maso samua orang

yang ada dalang antua pung karajaang

pung nama-nama. Raja basar kasi

kaluar parenta tu la samua orang bale

ka dong pung kota par kasi maso dong

pung nama-nama.

Lukas 2:1, 3

8

Jadi, Yusup dong kasi tinggal kota

Nasaret di propinsi Galilea. Dong pi ka

kota Betlehem di propinsi Yudea. Dolo-

dolo raja Daud lahir di situ. Dong pi ka

Betlehem, barang Yusup ni raja Daud

pung ana cucu lai. Dong musti kasi

maso dong pung nama di dong pung

kampong sandiri. Jadi, Yusup deng dia

pung tunangang Maria pigi sama-sama

la kasi maso dong pung nama. Maria tu

ada deng poro basar.

Lukas 2:4-5

9

Pas dong dua sampe di Betlehem, Maria

pung ana su mau lahir. Ana tu lahir di

situ. Dia laki-laki, Ana yang tua. Maria

bungkus Ana tu deng kaeng la kasi tidor

Dia di dalang binatang piara pung tampa

makang. Barang, su seng ada tampa

tinggal lai par dong dua sewa.

Lukas 2:6-7

10

Seng talalu jau dari tampa Yesus lahir,

ada orang jaga dong pung domba

sakawang malang-malang di tana

lapang yang barumpu. Takajo bagini,

ada Tuhan pung malekat satu datang

par dong. Tarus, Tuhan pung sinar

paleng tarang manyala koliling dong

sampe dong takotang paskali.

Lukas 2:8-9

11

Mar malekat tu bilang par dong kata,

"Kamong seng usa taku! Barang, beta

mau kasi tau Kabar Bae par kamong.

Kabar Bae tu bisa biking samua orang

pung hati paleng sanang. Hari ini ni, ada

Ana Kacil satu lahir di Daud pung kota

lahir. Kota tu pung nama Betlehem. Ana

tu yang nanti kasi salamat manusia dari

dong pung dosa-dosa. Dia tu Tuhan

yang Allah su Angka par Kasi Salamat

Manusia.

Lukas 2:10-12

12

Jadi, kamong pi la nanti lia Ana mera-

mera satu ada tabungkus deng kaeng.

Dia ada tidor dalang binatang piara

pung tampa makang. Tarus, kamong

bisa tau kalo apa yang beta bilang ni,

akang batul."

Lukas 2:12

Takajo bagini, dong dapa lia ada

malekat paleng banya datang bagabung

deng malekat yang tadi. Dong samua

manyanyi puji Allah bagini,

"Puji-puji Allah yang ada di tampa

yang paleng tinggi di sorga.

Antua baku bae deng orang-orang

yang biking Antua pung hati

sanang."

Lukas 2:13-14 13

Abis itu, malekat-malekat tu pigi kasi

tinggal dong samua la bale ka sorga.

Orang-orang yang jaga domba tu laeng

bilang par laeng bagini, "Mari katong pi

ka Betlehem par lia Ana mera-mera tu

macang deng Tuhan pung malekat su

bilang par katong!"

14 Lukas 2:15

15 Lukas 2:16-18

La dong samua paparipi par pi cari

tampa tu. Pas dong sampe, dong dapa

Maria, Yusup deng Ana mera-mera tu.

Ana tu ada tidor di binatang piara pung

tampa makang.

Pas dong dapa lia Ana mera-mera tu,

dong carita malekat pung pasang par

orang banya di situ soal Ana tu. Samua

orang di situ dengar orang-orang yang

jaga domba pung carita tu la dong

herang.

16

Mar Maria cuma simpang samua itu

dalang dia pung hati la cuma inga-inga

akang tarus. Tarus, orang-orang yang

jaga domba tu bale kombali. Dong

samua puji-puji Allah. Barang, samua

yang dong su dengar deng lia tu, akang

sama deng apa yang malekat su bilang

par dong.

Lukas 2:19-20