Short Story – Cebuano| Sa lalaking naligsan sa may interseksyon I ...
-
Upload
trinhxuyen -
Category
Documents
-
view
2.619 -
download
500
Transcript of Short Story – Cebuano| Sa lalaking naligsan sa may interseksyon I ...
Short Story – Cebuano| Sa lalaking naligsan sa may interseksyon
“As I said at the beginning, there’s no real moral or lesson to be learned from all this. But this is something that actually happened to him. Something that happened to all of us.”A Folklore for My Generation: A Pre-History of Late-Stage CapitalismHaruki Murakami
I.
GILILI niya sa bintana sa pasaheroang dyip nga iyang gisakyan ang nahimutangan sa
aksidente. Tayming kay stop ang light. Gikaras sa iyang panan-aw ang ensaktong dapit.
Interseksyon sa V. Rama ug N. Bacalso Avenue. Kanang may habog nga traffic light.
Kanang may gipangdemolis nga panimalay sa may kurbada paingon lusot Brgy. San
Nicolas. Nagdahom siya nga wala na ang lawas sa kadtong lalaking gabuy-od sa dalan
human naligsan sa 10F nga iyang gisakyan padulong sa iyang trabahoan ganihang
buntag. Wala na ang sling bag niining nabugtas, miluwa sa mga libro ug mga papeles
nga nagkatag sa dalan, gipadpad sa hangin. Pasado alas nuybe na sa kagabhion. Alas
otso medya sa buntag nahitabo ang maong disgrasya.
Namasin siya nga masigpatan kon aduna pa bay lama sa dugo sa mismong lugar
nga gilagpotan sa lalaki. Apan wala na. Wala nay timailhan sa nahitabong aksidente.
Wala nay handomanan niadtong makalilisang nga kabuntagon.
Sa kadtong guwapang estudyante’s San Carlos tapad niyang misinggit “My God!
My God!” dayon tabon sa iyang nawong aron di makit-an ang lalaking nagkadugo sa
dalan, o di ba kaha sa kadtong tigulang sa atbang-eskina nga nakapanguros og ahat kay
Page 1 of 23
nakasaksi sa panghitabo, basin og nahikalimtan na nila ang maong aksidente. Sa
kadtong mga batang Badjao nga manaygonay ug ni Manong tindero’g mineral water
nga dayon mialirong sa naligsan, basin og usa lang kadto sa mga naandan nilang talan-
awon sa kadalanan nga sama sa uban lumalabay lang. Apan kaniya, hangtod karon,
ingon sa adunay kabahin sa iyang hunahuna o sa iyang galamhan ba kaha o sa asang
dapitang di niya matuod ang naligsan usab ug mipabilin sa maong interseksyon.
Mibalik na man unta sa normal niining kalihokan ang tibuok kadalanan. Galaray sa
highway ang mga sakyanan kansang mga pasahero mga tawong naggikan sa tagsa-
tagsa nilang pakig-asdang sa kinabuhi. Mga komyuter sa dyip sagad mga estudyante
ug mga trabahanteng sama niyang di kaapord og awto. Mga propesyonal nga ang
kaharuhayng matagamtaman sa pagsakay og taksi ingon sa usa ka pribilihiyong
gitagana alang kanila. Mga drayber og pribadong mga sakyanan nga buot nang
makapahulay human sa ilang panisikay-sikay sa tibuok adlaw. Mga manguliay sulod sa
bus kansang biyahe tulo o lima pa ka oras depende sa gilay-on sa ilang padulngan. Ug
ubay-ubay ka mga motoristang mulusot-lusot sa panon sa mga sakyanan ingon sa
nakighagwa sa kamatayon.
Sa kanunay, hago iyang lawas matag uli gikan sa eskuylahan. Mukabat sab traynta
minutos iyang biyahe padulong uli sa ilang giabangang studio-type nga apartment sa
may Pardo. Maayo lang gali kay tua si Alma, iyang kapuyo, nga maoy muhilot-hilot
niya human sa ilang pagpanihapon dayon sa ilang pagkatulog.
Page 2 of 23
Kung maregular na ko, mupalit gyod kog awto, sa iyang hunahuna. Apan sayod siya sa
iyang kaugalingon nga kutob ra siya sa pagpangandoy kay bisan pa man og maregular
siya sa iyang pagkamaestro, dili gihapon paigo iyahang sweldo palit bisag second hand
man lang nga awto. Basin og sa pagpatubil lang paingon ang binuwan niyang
madawat. Maregular ba kaha ko sunod semester?
Mibulhot ang 10F nga iyang gisakyan pagkidlap sa green light. Tulin ang dagan sa
dyip nga matag karon ug unya muhunong kay adunay mukawas o musakay ba kaha
nga pasahero. Taliwala sa kasaba sa kadalanan, bisan unsa na lang ang musantop sa
iyang alimpatakan. Trabaho. Iyang badlungong mga estudyante. Leksiyon niya ugma.
Dedlayn sa test paper sa mga gradweyting. Iyang tatay sa Dumanjug. Si Alma. Abang
sa balay sunod semana. Ilang konsumo. Iyang doctoral. Ang kabahin nila ni Mary Jane.
Labaw sa tanan, kadtong complaint letter.
Kinsa man ang nagsuwat ato? sa iyang kaugalingon.
Kompiyansa siyang mupatigbabaw gihapon ang kamatuoran. Aduna gihapon siyay
hugot nga pagtuo sa hustisya ug kaangayan. Makasalig kang hatagan kini nako og patas
nga pagtagad. Aduna kitay due process, pu’ng pa sa iyang tsirman. Misuol og balik iyang
migraine nga ganihang udto pa nagsigeg hasol kaniya. Mibalik sa iyang panumdoman
kadtong lalaking naligsan ganihang buntag.
Kamubo ra gyod diay sa kinabuhi!
Page 3 of 23
Mipiyong siya kay daw mabuak iyang ulo. Unya, mikurog ang selpon sulod sa
iyang bulsa. Iya kining gikuot. Gikan kang Alma, nagkanayon: NBASA NKO TNAN NINYONG
MGA BALAK! I THOT ADUNAY PDULNGAN AKONG PAGPAABOT. IM SORRY IF I HAD TO DO
IT. IM SORRY IF I HAVE TO LEAVE U. GUDBYE!
II.
Kon may usa ka sugilanon si Murakami kansang kamatuoran hingpit ang pagkapukaw
sa iyang galamhan, o di ba kaha kansang karakter lig-on ang koneksyon sa iyang
kasingkasing ug kalag, kini na seguro ang “A Folklore For My Generation” niini.
Tungod sa lawom nga epekto sa maong sugilanon kaniya, iya kining gipaambit ug
gipabasa sa iyang mga estudyante sa Criticism of Fiction nga klase. Karong kataposang
klase niya sa 8 to 9 sa gabie, gituki nila ang maong sugilanon.
Nahitabo ang sugilanon sa dekada saysenta nga matod pa sa tagsugid niini, mao
ang dekada nga yano lang apan mabulukon ang pagpakabuhi sa taw – kon diin ang
hinungdan ug ang epekto sa mga penomenon daw suod nga managhigalaay, ug ang
teorya ug reyalidad kanunayng nanaggakos sa usag-usa ingon sa kini ang labing
natural nga butang dinhi sa kalibotan.
Nasagmuyo siya kay maihap ra sa iyang tudlo ang mga estudyanteng tataw nga
mibasa sa maong sugilanon. Apan bisan og maisip nga kini ang labing ngil-ad niyang
Page 4 of 23
adlaw, kay dili lalim iyang nasinati sukad pa ganihang buntag nga nakaligis iyang
gisakyang dyip ug hangtod ganiha sa meeting niya kang Dr. Kintanar nga mipahibalo
kaniya mahitungod sa usa ka letter of complaint, mas gilugwayan pa niya iyang
pasensiya.
“Taas man gud siya, Sir!” kasagarang reklamong nadunggan niya sa klase daw ang
bili ug kanindot sa usa ka sugilanon mahukman lang sa iyang gitas-on ug gimub-on.
Hinuon, sa iyang tan-aw, sa kasamtangang panahon, lisod na gyod pag-awhag og
basa sa mga kabatan-onan. Daghang mga lingla sa teknolohiya ug kalingawan sa
medya nga labawng ginahatagan nilag pagtagad ug importansya. Gali, mituo siyang
dako ang impluwensiya sa Internet kon nganong daghan kanila ang walay interes
karon sa pagbasa. Ug tungod pod daw aning mga “instant” sa atong modernong
panahon maong mingmubo ang pasensiya sa mga taw, labaw na gyod kanilang mga
batan-on. Ilaha daw ang henerasyon sa mga apurado, sa mga masuknaon, apan
kuwang sa pagpakabana ug wala nay pagtamod sa kanindot sa mga yanong butang nga
iya sa kinabuhi.
“Sir, to be honest, wala ko kasabot sa story,” sa labing sipat niyang tinun-an nga
motungha lang kon tinghawong na sa major exam.
Lisod gyod tuod tugkaron ang gilawmon sa mga sugilanon ni Murakami. Nabantog
ang Hapon nga pikyonista tungod sa iyang mga sugilanong sagad ang tema mulibod
gikan sa suryal ug sa tinagaw paingon sa kalibotanong pagpakabuhi sa taw. Mga
Page 5 of 23
sugilanong kansang kamatuoran gipahipi ug gilumloman sa kinauyokang bahin sa
pulong ug diwa. Para niya nga usa ka Literature teacher ug mahiligon sa pagbasa ug
pagpanulat, tulubagon sa mga mambabasa ang pagkaykay ug pag-irok sa maong
kamatuoran. Bulahan daw kadtong makatugkad, kadtong adunay mapupo. Labaw na
gyod kadtong kinabuhi nausab.
“But understanding a story is like understanding life!” Nabundak niya iyang
tingog. Lagmit bunga sa kahasol sa iyang migraine. Lagmit naupsan na gyod siya sa
pailob. Mituo siyang tanang butang sa kalibotan adunay kinutoban.
Mihilom ang tibuok klase. Takulahaw migilaw ang mga mata sa iyang mga tinun-
an samtang inanay nilang gipatuhop ang iyang gipamulong. Kon nasabtan ba nila ang
iyang buot ipasabot o mas nakapaubos ba hinuon og samot sa ilang interes sa pagbasa,
kana usa ka dako niyang tulukibon nianang tungora.
Apan sayod siya sa kamatuoran nga siya mismo wala pa makatugkad sa mga
tanghaga sa kaugalingong kinabuhi. Kon nganong hangtod karon, ingon sa adunay
kuwang, ingon sa aduna pa gihapoy kamatuorang nag-ung-ong nga lisod kaykayon. Sa
iyang pangedaron, luyo sa iyang mga naangkon nga kalamposan ug kadaogan, ingon
sa aduna gihapoy lapad nga haw-ang diha sa iyang dughan. Aduna siyay buot makab-
ot. Aduna siyay gigukod. Apan kini idlas. Ug sa kanunay iyang pailob ginasukod
taliwala sa kapaspas sa kinabuhi niining modernong panahon.
Page 6 of 23
Patay gyod to! Patay gyod to ba! miduwa-duwa sa iyang panumdoman ang siyagit sa
kauban niyang pasahero ganihang buntag.
III.
Maghapit tulo na sab siya ka tuig sa pagkamaestro dinhi sa usa ka iladong
pang-Katolikong unibersidad sa siyudad sa Sugbo. Ikatulong eskuylahan na kini niya
sulod sa unom ka tuig nga pagmaestro. Sa mga panggobernong tunghaan siya unang
nagtudlo kon diin tataw nga mas gamay ang sweldo. Magdawatan lang siya kaniadto
og dili mumenos sa katorse mil matag buwan. Apan bisan og miabot na kini sa kapin
dise-otso mil, dili lang gihapon paigo iyahang sweldo.
Kay lagi, lisod ang kinabuhi sa siyudad. Kada lihok gasto. Hapit tanang butang
adunay presyo. Kwarta ang nagpadagan sa kinabuhi sa taw. Kon magkuwang o wala
gyod siya niini, mismo ang siyudad ang muonay sa pagtukob kaniya. Maong
mahinungdanon nga mukayod ug manginabuhi. Kinahanglang magtigom kay kon dili,
iyawat mapasmo!
Puno siya sa ideyalismo ug pangindahay sa unang tulo ka tuig. Sauna wala
nakadepende iyang katagbawan sa gitas-on sa iyang binuwang sweldo kon dili sa
tiunay nga kalipay nga iyang maangkon sa pagkamaestro. Tinuod, malipayon siya
kaniadtong nagtudlo pa siya sa mga pampublikong tunghaan bisan og ubos ra ang
iyang madawat. Apan pipila ka tuig ang minglabay ug hinay-hinay nga napukan ang
Page 7 of 23
maong kalipay ug katagbawan tungod sa iyang mas dakong tinguhang magmadaugon
batok sa kamangtas sa siyudad.
Gidungagan pa gyod sa pagka-stroke sa iyang tatay sa miaging duha ka tuig.
Komplikasyon sa hypertension segun pa sa doktor. Atake’s kasingkasing ang namatyan
sa iyang apohan ug sa duha pa niya ka mga uyoan. Kaliwat lage nila. Matag-buwan,
ang katunga sa iyang sweldo ginapadala niya sa iyang nanay sa Dumanjug alang sa
mentenans sa iyang tatay ug sa mga galastoan sa balay.
Busa, nakahukom siyang dinhi sa pribadong tunghaan nga iyang kasamtangang
gitrabahoan siya magparegular. Kinahanglan niyang magpakapraktikal. Kinahanglang
dili na siya mag-usik og panahon. Importanteng aduna na siyay permanenteng trabaho.
Alang sa iyang tatay. Alang nilang duha ni Alma. Alang sa ilang kaugmaon. Maong
iyang giutngan ang tulo ka tuig o unom ka sagunson nga semestre nga maoy
gikinahanglan sa iyang probationary period. Kay lagi gawas nga mas dako ang sweldo,
maayo sad ang mga benepisyong madawat dinhi. Adunay mga incentives. Minilyon
ang makobra sa mga muretiro.
Usa si Alma sa mga nagsugyot niya nga mupabilin sa maong tunghaan. Hapit na
gyod ka maregular, Langga, ni Alma pa usa ka gabiing gimasahe siya niini. Kataposan na
lang ni nimo karong semestera, di ba? Matuman na gyod atong pangandoy nga magpakasal!
Gipasaligan niya si Alma nga menyoan sa panahon nga maregular na siya sa iyang
trabaho. Sulod sa lima ka tuig nilang pagpuyo-puyo, mapasalamaton siya sa iyang uyab
Page 8 of 23
sa walay utas niining pagpaabot. Andam kong maghulat. Ayaw kabalaka. Nakasabot ko sa
atong kahimtang, ni Alma pa.
Gisuta niya ang oras sa iyang relo: alas singko kinse. Taas-taas pa ang paabuton
alang sa sunod niya nga klase. Gitik-op niya ang libro ni Haruki Murakami human niya
mabasa ang usa sa mga sugilanon niini. Ang kahasol sa mga panghitabo sa tibuok
adlaw daw wala makakunhod sa iyang kahinam nga ipaambit sa iyang mga estudyante
unyang gabie ang mga kamatuoran mahitungod sa kinabuhi nga gisamin sa maong
sugilanon.
Gihilot-hilot niya iyang agtang lakip iyang tangkugo kay misugmat og balik iyang
migraine. Suol kini nga moduaw-duaw kaniya matag karon ug unya sukad pa sa
miaging mga semana. Sa makadaghang higayon giawhag siya ni Alma nga
magpakonsulta sa doktor. Sa makadaghang higayon pod niya kini gibalibaran. Dungag
sa gasto lang daw. Kay lagi, para niya, normal ra kini sa mga tawong himasa sama niya.
Kabahin na pod daw kini sa kinabuhi sa usa ka magtutudlo. Mefenamic ra konoy
remedyo.
Ug sama sa iyang migraine, hasol sab ang matag higayong maghinuklob siya sa
estado sa iyang trabaho. Sama karon. Hasol hunahunaon ang kamatuoran nga angayan
na man unta siyang maregular. May pipila ka mga kauban niya ang naregular na bisan
og wala pa kini nakaabot sa unom ka semestre. May mga hungihong nga lagi kusog
ilang kapit sa administrasyon maong naswertehan. Sama na lang kang Ma’am Elvira
Page 9 of 23
nga ig-agaw sa asawa sa ilang tsirman. Bisan og duha pa lang gani kini ka tuig
nagtudlo, naregular na dayon kay lagi media practitioner kaniadto ug walay laing
makatudlo og MassCom. “Need” lagi daw sa department.
Apan siya nga misalig sa diwa sa kaligdong ug pagpaningkamot, kinahanglang
magpaabot. Walay katungod ang susama niya nga mukwestiyon o mupiyait. Siya nga
mituo sa gahom sa kaangayan, kinahanglang muluom aron puhon siya pod
maswertehan. Bisan pa man og dugay na unta niyang nahuman iyang Masters nga
maoy basic requirement sa pagpanudlo sa kolehiyo ug libro na lang ang kuwang aron
mahuman niya iyang Doctoral. Bisan pa man og maayo unta siyag performance ug taas
iyang mga evaluation gikan sa iyang mga estudyante.
Usa ka dakong himaya ang naghulat sa tawong mapailubong nagpaabot, nahinumdom
siya sa gipamulong ni Dr. Kintanar kaganiha sa ilang meeting.
IV.
Unang nakailog sa iyang atensiyon ang itom nga name plate ibabaw sa lamesa:
GREGORIO M. KINTANAR, Ph. D., Ed. D. Sa ubos: Chairman, Department of
Communication, Languages and Literature. Ikaduha: ang mga tropeyo ug plake nga
gipatong sa estante sa tuong bahin sa lawak.
Dili man unta kini ang unang higayon nga nakasulod siya sa hamugawayng opisina
sa ilang tsirman, apan sa matag sulod niya dinhi, dili niya malikayang mahingangha sa
Page 10 of 23
kadaghang pasidungog nga gibalandra halos sa matag suok. Model Teacher of the Year.
Excellence in Service Award. Best Researcher in the Philippines. Toastmaster Awardee.
Most Outstanding Academician in Cebu. Wala niya malikayang itandi ang iyang
kaugalingon sa iyang tsirman. Anam-anam siyang mihiyos sa iyang gibarogan.
Carpe diem! sa iyang hunahuna. Matag abli sa semestre magpa-filmshowing siya sa
Dead Poets Society nga usa sa mga kinaham niyang pelikula ni Robin Williams.
Pampadasig sa iyang mga estudyante. Pampadasig sab sa iyang kaugalingon. Gali,
tungod sa maong pelikula, usahay tawgon siya sa iyang mga estudyante og “O Captain!
My Captain!”
Nakahukom siyang makighinabi kang Dr. Kintanar kabahin sa estado sa iyang
regularisasyon. Kinahanglang dili ni niya palabyon. Kinahanglang lunggubon niya
kining higayon.
Kon dili pod tungod ni Mary Jane, kauban niyang maestra sa ilang departamento
nga naabtan niyang naghilak kaganiha, dili unta ni niya buhaton. Gahilak kining
misumbong kaniya kay wala daw tugoti sa iyang bana nga muadto sa Maynila aron
personal nga mutan-aw sa iyang idolong si Sarah Kay. Natandog siya sa gipakitang
kaikag sa maong maestra, sa dedikasyon niini sa pagkab-ot sa iyang pangandoy: ang
mahimamat ang usa ka tawong nakapatandog ug nakapausab sa iyang kinabuhi. Sama
niya, paborito sad ni Mary Jane ang maong pelikula ni Robin Williams.
Carpe diem...Seize the day...tingog ni Mary Jane sa iyang hunahuna.
Page 11 of 23
Mihunong sa pagsuwat si Dr. Kintanar sa dihang nakamatikod kini sa iyang
presensiya.
“Good afternoon, Sir!” pangatahoran niya, ug dayon milingkod sa tuong
lingkoranan atubangan sa lapad nga lamesa.
“Maayo nga ania ka karon dinhi, Brod,” sa iyang tsirman. Batasan na niini ang
pagtawag og “Brod” sa mga maestro ug “Sis” sa mga maestra sa iyang departamento.
Miyembro lagi silang Dr. Kintanar ug iyang asawa sa Couples for Christ. Pamaagi pod
daw niini aron mas masuod sa iyang mga sakop. Istratehiya niini aron ipakitang usa
siya ka maabi-abihon. Nan, usa ka lider nga maduolan.
Maglima na sab ka tuig kining tsirman sa ilang departamento. Kapin sa napulo ka
tuig nga nagtudlo sa maong tunghaan una nabutang sa maong puwesto. May mga
hugunhugon nga siya ang mupuli kang Dr. Retoya sa pagka-dean sa College of Arts
and Sciences nga kagabii lang namatay tungod sa colon cancer.
“I was about to ask my secretary to call you,” padayon ni Dr. Kintanar.
May nagsaulog sulod sa iyang dughan. Ngano kaha? sa iyang hunahuna. Tungod
kaha sa akong regularisasyon?
“This is your last semester before you finally complete your probationary period.
And I exactly know that feeling. Kanang pila na lang ka lakang ang kuwang ug maabot
na gyod nimo ang finish line.”
Mas mipaspas ang hinagubtob sa iyang dughan.
Page 12 of 23
“A-actually Sir, mao sad kana ang rason nganong mianhi ko. I wanted to talk to you
about it.” segun niya sa wala nay pag-ukon-ukon.
“Ang tinuod, Brod, I’d sent my endorsement letter for your regularization last week
pa. It must be by now on the President’s table for approval.”
Buot niyang mungisi, mukatawa, magsaulog. Human sa unom ka tuig nga
pagpaabot, sa kataposan, aduna na gyod siyay permanenteng trabaho.
“T-thank you, Sir.”
Nag-ung-ong kilid sa iyang mga mata iyang mga luha. May kahigwaos ug kabalaka
nga nabagtok sa iyang dughan sulod sa katuigan ang inanay nga nahilis, gihulipan og
kadaogan.
Iyang naamgo nga dili diay tinuod ang sulti-sulti sa uban nga kuno gamiton ni Dr.
Kintanar iyang posisyon aron masanta ang regularisasyon sa mga magtutudlong dili
siya pabor ug pasudlon ang kadtong iyang ganahan. Sama na lang daw sa iyang pag-
umangkong si Sir Joseph nga usa sab ka Literature teacher ug kandidato sab sa
pagkaregular. Una lang siya og usa ka tuig niini.
Ay kuyaw Sir kon ma-bypass ka ni Sir Joseph! segun pa sa usa ka maestrang tabian
kaniya kaniadto. Blood is thicker than water baya!
“But, I’m afraid I have to retract the letter.”
Kalit naputol iyang paghanduraw sa gisulti ni Dr. Kintanar.
Page 13 of 23
“Retract the letter, Sir?” giklaro niya kay basin og nasayop ra siya sa iyang
nadunggan.
“As teachers, especially in a Catholic school like ours, we have to be the role models.
It is our responsibility to act with utmost decency and professionalism,” mihunong kini
sa makadiyot ug mitutok kaniya usa mipadayon. “This institution does not condone
any act of immorality.”
Immorality? buot niyang ipangutana sa iyang tsirman. Apan naamang siya sa iyang
gilingkoran. Bisan og adunay mga bati nga ikasulti ang uban kang Dr. Kintanar, para
niya, dili malimod nga larawan kini sa usa ka matarong nga akademisyan. Ehemplo sa
usa ka lider nga ginatahod. Ligdong. Adunay baroganan sa ngalan sa iyang propesyon.
Sa iyang pagka-tsirman, may pipila na sab ka mga kaso sa mga magtutudlo sa iyang
departamento ang iyang nahusay. Ang sumpaki nilang Ma’am Rosales ug Ma’am
Toledo. Ang isyu sa moonlighting ni Sir Cimafranca. Ug niining ulahi, ang giingong
pagbaton og uyab nga usa ka estudyante ni Dr. Agustin nga nakapalagpot gyod niya sa
tunghaan ug giingong nang-ahente na lang karon og insurance sa St. Peters.
“How young are you, Brod, by the way?”
Nakurat siya sa maong pangutana ni Dr. Kintanar. Kalmado gihapon ang tingog
niini. Walay timailhan nga kini nasuko o nanulisok ba kaha.
“T-twenty-eight, Sir,” iyang tubag.
Page 14 of 23
“Nasayod ka ba nga I was also at your age when I became a regular faculty in this
university?” Wala siya masayod unsay itubag. Wala siyay ideya unsay padulngan niini.
“Ug sama nimo,” padayon ni Dr. Kintanar, “I was way ahead of my age. I already had
my Masters sa dihang nagsugod kog tudlo dinhi. Maong nagtuo ko na i-endorso ko
dayon sa akong tsirman that time. Pero wala. And I told myself: maybe it wasn’t
enough. So, I decided to get a Ph.D.” May garbo sa nawong ni Dr. Kintanar samtang
nagsud-ong sa iyang kagahapon. “And after two years and a half, I became one of the
youngest Ph.D. holders in the Philippines. I thought that time I’d proven enough not
only to my chairman and to the department, but most especially to myself. But, it wasn’t
enough.”
Misandig si Dr. Kintanar sa iyang swivel chair. Giukang niini iyang antepara ug
gitrapohan gamit ang usa ka panyolito.
“Pero sama sa nahitabo nimo, she let me wait until I fully satisfied my probationary
period. Believe me, usa ka dakong himaya ang naghulat sa tawong mapailubong
nagpaabot.”
Kalit mingduaw sa iyang panumdoman ang mga pait niyang kasinatian sa mga
katuigang pagpaabot. Sa mga katuigang pakigbatok sa kamangtas sa pagpakabuhi sa
siyudad.
Adunay gikuot si Dr. Kintanar sa iyang drawer. Usa ka sobre. Gitunol kini kaniya.
“Take your time to read that,” segun niini.
Page 15 of 23
Hingpit na nga nahulipan og kabalaka ang kaganihang pagsaulog sa iyang dughan.
Gibasa niya ang suwat sulod sa sobre. Ingon sa giluiban siya sa iyang gininhawa.
Naglumbaanay ang pinitik sa iyang kasingkasing ug ang dagan sa iyang hunahuna.
“It’s a complaint letter sent anonymously to my office. About your alleged affair
with Mrs. Villafuerte. Of course, makasalig kang hatagan kini nako og patas nga
pagtagad. Aduna kitay due process. As your Chair, buot nakong masayod ka
mahitungod ani before it reaches the office of the dean. Please expect from us doing
thorough investigation on this matter.”
Nahinumdom siya sa hinungdan kon nganong nagpamiyembro silang Dr. Kintanar
ug iyang asawa sa Couples for Christ. Tungod daw kay nasakpan sa ilang tsirman ang
iyang asawa nga nagluib kaniya.
Buot niyang mudepensa sa kaugalingon diha-diha dayon. Buot niyang panalipdan
iyang reputasyon. Apan padayon siyang naamang. Walay pulong nga migawas gikan sa
iyang baba. Gipaabot niyang hingpit nga makatuhop ang matag pulong sa maong
suwat. Naghasol sa iyang hunahuna ang tingog sa kadtong kauban niyang maestra:
Blood is thicker than water baya!
Si Dr. Kintanar ang mibuak sa mubong kahilom bunga sa iyang padayong
pagkaamang.
“I’ve heard you’re studying Murakami’s stories for your dissertation.”
“Y-yes, Sir,” sa kataposan mingtubag na siya.
Page 16 of 23
“Ah, ‘Dabchick’?”
Wala siya magdahom nga tigbasahan diay pod si Dr. Kintanar ni Murakami. Ug ang
sugilanong “Dabchick” mismo ang nahinumdoman niini. Sa iyang tan-aw, kini ang
sugilanong nagtangag og usa ka dayag nga kamatuoran sa kinabuhi: nga tanang
pagpaabot sa tawo walay pulos kay may mga butang nga mahitabo sa kinabuhi nga dili
niya mahisabtan, nga dili niya mapugngan, nga dili niya malikayan. Haom kaniya sa
pagkakaron.
“Yes, Sir. Usa na sa iyang mga sugilanon.”
“Usa sa akong mga paborito,” nagngising butyag ni Dr. Kintanar. “For me, his
stories seem to be absurd. They just don’t make sense on the surface. Tinagaw kon baga.
Pero, suwayig kaykay. Adunay nagpahiping kamatuoran. Ingon ana man gyod seguro
ang kinabuhi, di ba?”
Naglutaw gihapon iyang hunahuna. Hangtod karon nasangit gihapon kini,
nagtuyok-tuyok daw lilo taliwala sa mga pulong sulod sa suwat. Nabalaka siya sa iyang
trabaho. Nabalaka siya kang Mary Jane.
Kinsa man ang nagpadala aning complaint letter? Nganong nasayod man siya kabahin
namo ni Mary Jane? sa iyang hunahuna. This just doesn’t make sense! Nganong karon pa
man? Karon pa hinuon nga hapit na ko...
“Usa sa mga karakter nga mitatak gyod nako kadtong nganlag Yoshiko Fujiwara,”
ni Dr. Kintanar. “Kadtong sa ‘A Folklore For My Generation’ niya.”
Page 17 of 23
V.
Si Yoshiko Fujiwara, kining hinigugma sa lalaking higala sa tagsugid sa sugilanon ni
Murakami nga kasamtangan niyang ginabasa, usahay mahunahunaan niyang si Mary
Jane kini. Ug siya mao ang lalaki.
Kaniadto, daghan ang nag-ingon nga pareson sila ni Mary Jane. Sama nilang
Yoshiko ug sa iyang boypren sa hayskul nga maisip nga “spiritual twins” kay lagi
perpekto sila sa usag-usa, Miss Clean ug Mister Clean segun pa sa tagsugid, sila usab ni
Mary Jane giisip sa ilang mga colleagues sa department nga sila daw maoy gitagana sa
usag-usa, nga sila daw ang magkadayon ugma damlag. Posible unta kini kaniadto kon
wala pa si Alma sa iyang kinabuhi.
Literature sab ang ginatudlo ni Mary Jane. Hilig pod niya ang pagbasa ug
pagsuwat. Aduna siyay taas nga respeto sa mga babayeng magsusulat, labaw na sa mga
balakista. Sama nilang Dickinson, Plath, Sexton, o di ba kaha nilang Tiempo ug
Almerino, mas matud-anon daw sa ilang gibati ang usa ka babayeng magbabalak. Mas
lig-on og bukog. Mas kagumkom ang tingog.
Nahinumdom siya niadtong mga panahon nga magbinayloay sila ni Mary Jane og
mga balak. Mga balak kabahin sa ilang kahingawa, kaguol, ug kalipay. Sa ilang mga
pangandoy sa kinabuhi. Sa ilang mga kapakyasan. Gali, hangtod karon, gitapigan
gihapon niya kining ilang mga balak labaw na kadtong mahitungod sa gugma.
Page 18 of 23
Dinhi sa ilang mga balak napadayag nila ang mga butang nga dili nila malitok o
mabutyag sa opisina, sa presensiya sa ilang mga kaubang magtutudlo, o mismo sa ilang
atubangan. Kaniadto, dinhi sa ilang mga balak aduna silay kaugalingong kalibotan. Usa
ka kalibotang walay paghukom ug walay paglubad. Usa ka kalibotang lahi sa ilaha ni
Alma.
Apan, sa dihang nahisayran ni Mary Jane ang kabahin nila ni Alma, anam-anam
nga kining kalibotan mihiyos ug nahanaw. Duha ka buwan human adto, namenyo si
Mary Jane kang Sir Raul Villafuerte nga usa ka Chemistry teacher. Nasayod siyang
dako na ang kalainan sa bag-ong kalibotan ni Mary Jane sukad kini namenyo.
Karong lunchtime, naabtan niyang naghilak kini sa kaugalingong cubicle.
“Jane,” tawag niya dayon pikpik sa abaga niini, “Unsay problema, Ma’am?”
“Nganong dili man siya makasabot?” tubag niini nga gabakho, gitabonan ang
nawong sa duha ka mga kamot. “Nganong dili na man lang siya musuporta?”
Milingkod siya sa bakanteng lingkoranan tapad ni Mary Jane. Miatubang ang
maestra kaniya. Naghawid kinig usa ka libro. “No Matter The Wreckage” ni Sarah Kay.
“This can be my only chance to see Sarah Kay in person. Pero dili ko niya tugtan
molarga sa Maynila.” Morag bata nga misumbong, nagpalaban kaniya si Mary Jane.
Buot unta niyang muagik-ik kay namuot sa kamabaw sa hinungdan kon nganong
naghilak kini. Abi niyag unsa! Apan gipugngan niya ang kaugalingon. Nasayod siyang
aduna kini mas lawom nga hinungdan.
Page 19 of 23
“If there’s one person I want to meet,” padayon niini, “it’s her! Wala lang siya
masayod kon unsa kadako ang impluwensiya ni Sarah Kay kanako.”
May kalayo sulod sa iyang dughan ang kalit midilaab. Ingon sa mibalik human
dusliti ang kaniadtong pagbati niya alang kang Mary Jane, ang iyang pagdayeg alang sa
maestra. Sa iyang hunahuna, lig-on gyod tuod ang bukog sa susama ni Mary Jane.
Gikahibudngan niya nianang tungora kon nganong may mga pagbati nga
gipanamkon sauna sulod sa mubong panahon ang kalit lang moduaw ug temporaryong
mohulip sa usa ka pagbating gisapnay unta sulod sa katuigan. Nanghinaot siya nga
kini temporaryo lang unta. Apan, sa iyang kasingkasing, gikahidlawan niya kining
pagbati. Hangtod karon ingon sa lab-as pa kini susama sa kagahapon.
“You know what, Sir? Bahala na! Bahala na unsay iyang ikasulti nako. But I have to
take my chance. Muadto kog Maynila sa musugot siya o dili!”
Sa iyang panan-aw, misamot kaambongan si Mary Jane. Dalaygon kini ug labing
halangdon. Sa iyang panan-aw, si Mary Jane ug si Yoshiko nahimong usa. Si Yoshiko
nga namenyo sa lain. Si Yoshiko nga pipila ka tuig ang milabay human mamenyo
mingtawag sa iyang kanhi hinigugma ug miagda niini sa pagbisita kaniya aron iyang
tumanon ang iyang gisaad: ang makighilawas niini kon mamenyo na siya sa lain.
Kon natigom ba niya sulod sa usa ka balak nga iyang namugna ang tanang kalipay,
katagbawan, ug katumanan nga iyang nabati niadtong usa ka gabiing gisaw-an nila kini
Page 20 of 23
ni Mary Jane, sulod sa kuwarto niini, niadtong mitambong og seminar si Sir Villafuerte
sa Maynila, kana wala niya masayran.
Kon natapok ba sa maong balak tanang posibleng katarongan kon nganong sa
kalibotan ni Mary Jane mas malipayon ug gawasnon siya; kon nganong ang pisikal nga
kalibotan diha-diha nga mahanaw ug pulihan niining suryal nga kalibotan nila nga
walay paghukom ug walay paglubad, sukwahi sa kalibotan nila ni Alma nga daw ang
iyang kinabuhi walay bulok, walay tumong, ug walay padulngan, kana usa ka
pangutanang nag-ung-ong sa iyang hunahuna hangtod karon.
May mga kamatuoran tuod sa kinabuhi ang magpabiling tulukibon ug lisod
tugkaron. Sama sa konsepto sa gugma. Sama sa konsepto sa takna ug higayon.
VI.
Misugat niya pag-abot sa opisina ang usa ka masulub-ong balita nga mitaliwan na
kagabii si Dr. Retoya, ang dean sa CAS, human sa duha ka semanang pakigbatok niini
sa kamatayon sulod sa ICU. Kapin sa napulo na sab kini ka tuig naglingkod isip dean.
Dako ang nahimong kotribusyon ni Dr. Retoya sa pagpalambo sa ilang college ug sa
paghatag og dungog sa ilang eskuylahan. Usa ka higante. Usa ka emperyo. Giisip nga
usa sa mga haligi sa ilang tunghaan ang gikutkot sa usa ka balatian ug hingpit nga
gitumpag ug gipukan sa kamatayon.
Page 21 of 23
May uban, lakip niya, ang andam mopusta nga si Dr. Kintanar nga adunay duha ka
doctorate ang posibleng mohulip kang Dr. Retoya sunod semestre. Naa say uban ang
nakiglalis nga si Dr. Garcia daw sa Behavioral Sciences. Naay uban ang nagtuo nga si
Dr. Lariego sa Mathematics and Sciences Department nga mas dugay naglingkod isip
tsirman ang mas angayan sa maong puwesto. Puros mga doctor. Kon dili tag-usa, tag-
tinagurha. Puros adunay mga pangalan. Puros gamhanan. Puros lig-on. Puros pod
adunay kapit sa administrasyon.
Ako kaha kanus-a ma-doctor? sukit niya sa iyang kaugalingon samtang naminaw sa
iyang mga kaubang mga maestrong nagdebate sa ilang opisina.
VII.
Alang niya, usa ka dakong mangtas ang siyudad. Matag adlaw kinahanglang
makigbugno siya niini. Kinahanglang dili magpapildi aron dili siya lamyon.
Ug kining pakiggubat niya batok sa maong mangtas magsugod bisan sayo pa sa
kabuntagon. Sa pagmatag sayo human sa pila lang ka oras nga pagkatulog kay lagi
nagtseking sa mga papel sa iyang mga estudyante o di ba kaha nag-andam alang sa
iyang klase sunod adlaw. Sa paspas nga pagkaon sa iyang pamahaw morag wala nay
usap-usap, o usahay kon wala na gyoy oras, sa pag-inom na lang sa iyang kape
masudlan lang gyod iyang tiyan aron dili maabtan sa rush hour. Apan, maabtan lang
Page 22 of 23
diay gihapon. Sa pag-inilogayg sakay og dyip kuwang na lang tunlon niya iyang garbo
ug mukapyot aron lang gyod dili ma-late sa klase.
Mangtas ang dagway sa kadalanan!
Sa kanunay, galaray sa highway ang mga sakyanan kansang mga pasahero mga
tawong padulong sa tagsa-tagsa nilang pakig-asdang sa kinabuhi. Mga tawong sama
niya nga adunay buot makab-ot. Mga tawong sama niya nga adunay kanunay gigukod.
Apan kini kanunayng idlas.
Adlaw-adlaw, sukdon iyang pailob samtang gasakayg dyip padulong sa iyang
trabahoan taliwala sa katrapik sa highway. Sukdon ang gimub-on sa iyang pailob
samtang maghinuklob siya sa estado sa iyang trabaho. Sukdon sab ang gitas-on niini
samtang mamalandong siya unsa pa kalayo kaniya ang kalamposan.
Daghang higayon nga daw maupsan na siya sa pailob. Daghang higayon ang ingon
sa mosurender na lang siya sa kaaway kay lagi padulong na siya sa iyang pagkapukan.
Labaw na kon layo pa siya sa iyang padulngan. Ug ang gisakyang dyip di makairog.
Nasangit sa matag interseksyon sa highway. Ug ang oras sa iyang relo paspas ang
dagan.
(KATAPOSAN)
Page 23 of 23